മാസാദ്യവെള്ളിയാഴ്ചയിലെ പ്രതിഷ്ടാജപം

ഈശോമിശിഹായുടെ തിരുഹൃദയമേ,ഇതാ ഞങ്ങള്‍ അങ്ങേതിരുമുമ്പില്‍ മുട്ടുകുത്തി ഞങ്ങള്‍ക്ക് അങ്ങ് ചെയ്ത സകല ഉപകാരങ്ങള്‍ക്കും അങ്ങേയ്ക്ക് ഞങ്ങള്‍ സ്തോത്രം ചെയ്യുന്നു.ഓ! ഈശോയെ,അങ്ങ് ഞങ്ങളെ അറിയിച്ചവിധത്തില്‍ അങ്ങേ തിരുമനസ്സ് നിറവേറ്റുന്നതിനും ആരാധനയ്ക്കു പാത്രമായ അങ്ങേ തിരുഹൃദയത്തിന്റെ രാജ്യം ഞങ്ങളുടെ നാട്ടില്‍ വേഗം പരത്തുന്നതിനുംവേണ്ടി പരിശുദ്ധ കന്യകാമറിയത്തിന്റെയും വി. ഔസേപ്പിതാവിന്റെയും മദ്ധ്യസ്ഥത്താല്‍ ഞങ്ങളുടെ കുടുംബം (സമൂഹം)മുഴുവനും അങ്ങേയ്ക്ക് ചെയ്തിരിയ്ക്കുന്ന പ്രതിഷ്ഠയെ ഞങ്ങള്‍ ഇപ്പോള്‍ എത്രയും ഭക്തിതീക്ഷ്ണതയോടെ കൂടെ നവീകരിക്കുന്നു.ഞങ്ങളുടെ ഭവനം നസ്രത്തിലെ അങ്ങേ തിരുകുടുംബം പോലെ ബഹുമാനത്തിന്റെയും ജപധാന്യങ്ങളുടെയും സമാധാനത്തിന്റെയും വാസസ്ഥലമാകട്ടെ.അങ്ങ് ഞങ്ങളുടെ ജീവിതത്തിന്റെ ഉത്തമ മാതൃകയും സകല കാര്യങ്ങളിലും ഞങ്ങളുടെ ഉറപ്പുള്ള പരിപാലകനുമായിരിക്കണമേ. പരിശുദ്ധമായ സ്നേഹത്തിനു പാത്രമായ ഈശോയേ!ഞങ്ങളുടെ കുടുംബ ജീവിതത്തിലുണ്ടാകുന്ന സുഖദു:ഖങ്ങളൊക്കെയും അങ്ങേയ്ക്ക് ഞങ്ങള്‍ കാഴ്ചവെയ്ക്കുന്നു.ഈ കുടുംബത്തിലുള്ളവരുടെമേലും മരിച്ചവരുടെമേലും അങ്ങേ വിലയേറിയ അനുഗ്രഹങ്ങള്‍ വര്‍ഷിക്കുമാറാകണമെന്ന് ഞങ്ങള്‍ ഹൃദയപൂര്‍വ്വം
അപേക്ഷിക്കുന്നു.ഞങ്ങളെ മുഴുവനായി അങ്ങേയ്ക്ക് സമര്‍പ്പിക്കുന്നു.ഈ കുടുംബത്തില്‍ (സമൂഹം)ആരെങ്കിലും അങ്ങേ പരിശുദ്ധ സ്നേഹം ഉപേക്ഷിക്കുവാനുള്ള നിര്‍ഭാഗ്യത്തില്‍ ഉള്‍പ്പെട്ടുവെങ്കില്‍
അയാളുടെ പാപത്തിനുവേണ്ടിയും ഞങ്ങള്‍ പരിഹാരം ചെയ്യുന്നു.അങ്ങേ തിരുഹൃദയത്തിന്റെ നാമത്തില്‍ ഞങ്ങളുടെ പരിഹാരം കൈകൊണ്ട് ലോകമൊക്കെയുള്ള എല്ലാ കുടുംബങ്ങളെയും ആശിര്‍വദിക്കണമെന്നും
അങ്ങയോടു ഞങ്ങള്‍ പ്രാര്‍ത്ഥിക്കുന്നു.അങ്ങേയ്ക്ക് സ്വന്തമായിരിയ്ക്കുന്ന കത്തോലിക്കാകുടുംബങ്ങളില്‍
മാത്രമല്ല ,അങ്ങേ സത്യസഭയില്‍ നിന്നും പിരിഞ്ഞുപോയിരിക്കുന്ന മതന്വേഷികളുടെയും അങ്ങേ അറിയാത്ത
അക്രൈസ്തവരുടേയും കുടുംബങ്ങളില്‍ അങ്ങേ ദിവ്യരാജ്യം സ്ഥാപിക്കണമെ.ശിശുക്കളുടെമേല്‍ അങ്ങു കടാക്ഷിക്കണമേ.വിദ്യാര്‍ത്ഥികളുടെ അഭ്യസന രംഗമായ വിദ്യാലയങ്ങളെയും ,ബാലികാബാലന്മാരുടെ ദൈവവിളിയെയും അങ്ങ് കാത്തുകൊള്ളണമേ. രോഗികള്‍ക്ക് ശക്തിയും വൃദ്ധന്മാര്‍ക്ക് സഹായവും വിധവകള്‍ക്ക്‌ ആശ്രയവും അനാഥര്‍ക്കു പിതാവും അവിടുന്നാകണമെ.ഓരോ കുടുംബങ്ങളിലുമുള്ള രോഗികളെയും മരണവേദന അനുഭവിക്കുന്നവരെയും അങ്ങ് സഹായിക്കണമേ.വിശേഷിച്ചു കൃപയുടെയും സ്നേഹത്തിന്റെയും സമുദ്രമായ ഈശോയെ!ഞങ്ങളുടെ മരണനേരത്ത് ഞങ്ങളെ സഹായിക്കണമെന്ന് അങ്ങയോടു
ഞങ്ങള്‍ പ്രാര്‍ത്ഥിക്കുന്നു.ആ സമയത്ത് അങ്ങേ ദിവ്യഹൃദയത്തോടും ഞങ്ങളെ ഒന്നിപ്പിക്കണമെ.അപ്പോള്‍ ഞങ്ങളുടെ ആശ്രയവും സങ്കേതവും ആശ്വാസവും അവിടുന്നാകണമെ.ഈശോയുടെ തിരുഹൃദയമെ!നന്മരണം
പ്രാപിച്ച് ഞങ്ങളെല്ലാവരും അങ്ങയോടുകൂടെ സ്വര്‍ഗ്ഗീയ ഭാഗ്യം അനുഭവിക്കുവാന്‍ ഇടയാക്കണമെ. ആമ്മേന്‍.

തിരുഹൃദയ ലുത്തിനിയ

കര്‍ത്താവേ അനുഗ്രഹിക്കണമേ
മിശിഹായേ അനുഗ്രഹിക്കണമേ
കര്‍ത്താവേ അനുഗ്രഹിക്കണമേ
മിശിഹായേ അനുഗ്രഹിക്കണമേ (ഞങ്ങളെ അനുഗ്രഹിക്കണമേ)
മിശിഹായെ ഞങ്ങളുടെ പ്രാര്‍ത്ഥന കേള്‍ക്കണമേ
മിശിഹായേ ഞങ്ങളുടെ പ്രാര്‍ത്ഥന കൈക്കൊള്ളണമേ
സ്വര്‍ഗ്ഗസ്ഥനായ പിതാവായ ദൈവമേ
ലോകരക്ഷകസുതനായ ദൈവമേ
പരിശുദ്ധാല്‍മാവായ ദൈവമേ
ഏകസ്വരൂപമായിരിക്കുന്ന പരിശുദ്ധ ത്രിത്വമേ
നിത്യപിതാവില്‍ കുമാരനായ ഈശോയുടെ തിരുഹൃദയമേ
കന്യകാമാതാവിന്‍ തിരുവുധരത്തില്‍ പരിശുദ്ധാല്‍മാവിനാല്‍ രൂപികരിക്കപ്പെട്ട ഈശോയുടെ തിരുഹൃദയമേ
ദൈവവചനത്തിന്റെ കാതലായ ഈശോയുടെ തിരുഹൃദയമേ 
ദൈവത്തിന്‍ പരിശുദ്ധാലയമായ ഈശോയുടെ തിരുഹൃദയമേ
അനന്തമഹിമയുള്ള ഈശോയുടെ തിരുഹൃദയമേ
ദൈവഭവനവും മോക്ഷവാതിലുമായ ഈശോയുടെ തിരുഹൃദയമേ (ഞങ്ങളെ അനുഗ്രഹിക്കണമേ)
ജ്വലിച്ചെരിയുന്ന സ്നേഹാഗ്നിച്ചൂളയായ ഈശോയുടെ തിരുഹൃദയമേ
നീതിയുടെയും സ്നേഹത്തിന്റെയും നിധിയായ ഈശോയുടെ തിരുഹൃദയമേ
നന്മയും സ്നേഹവും നിറഞ്ഞ ഈശോയുടെ തിരുഹൃദയമേ
സകല പുണ്യങ്ങളുടെയും ആഴമേറിയ നിധിയായ ഈശോയുടെ തിരുഹൃദയമേ
സകല പുകഴച്ചയ്ക്കും എത്രയും യോഗ്യമായ ഈശോയുടെ തിരുഹൃദയമേ
സകല ഹൃദയങ്ങള്‍ക്കും അധിപനും കേന്ദ്രവുമായ ഈശോയുടെ തിരുഹൃദയവുമായ
ജ്ഞാനത്തിന്റെയും അറിവിന്റെയും നിധിയൊക്കെയും അടങ്ങിയിരിയ്ക്കുന്ന ഈശോയുടെ തിരുഹൃദയമേ
ദൈവമഹത്വത്തിന്റെ പൂര്‍ണ്ണതയൊക്കെയും വസിക്കുന്നതായ ഈശോയുടെ തിരുഹൃദയമേ
നിത്യപിതാവിനു പ്രസാദാല്‍മകമായ ഈശോയുടെ തിരുഹൃദയമേ
ഞങ്ങള്‍ക്കെല്ലാവര്‍ക്കും സിദ്ധിച്ചിരിക്കുന്ന നന്മകളുടെ സമ്പൂര്‍ണ്ണനിധിയായ ഈശോയുടെ തിരുഹൃദയമേ
നിത്യമഹത്വങ്ങളുടെ ആശയായ ഈശോയുടെ തിരുഹൃദയമേ
ക്ഷമയുള്ളതും അധികദയയുള്ളതുമായ ഈശോയുടെ തിരുഹൃദയമേ
അങ്ങേ കൃപയാചിക്കുന്ന സകലരേയും ഐശ്വര്യപ്പെടുത്തുന്ന ഈശോയുടെ തിരുഹൃദയമേ
ജീവന്റെയും വിശുദ്ധിയുടെയും ഉറവയായ ഈശോയുടെ തിരുഹൃദയമേ
ഞങ്ങളുടെ പാപങ്ങള്‍ക്ക്‌ പരിഹാരമായ ഈശോയുടെ തിരുഹൃദയമേ
നിന്ദകളാല്‍ പീഡിക്കപ്പെട്ട ഈശോയുടെ തിരുഹൃദയമേ (ഞങ്ങളെ അനുഗ്രഹിക്കണമേ)
ഞങ്ങളുടെ അക്രമങ്ങള്‍ നിമിത്തം തകര്‍ന്ന ഈശോയുടെ തിരുഹൃദയമേ
മരണത്തോളം കീഴ്വഴക്കമുള്ള ഈശോയുടെ തിരുഹൃദയമേ
സകല ആശ്വാസങ്ങളുടെയും ഉറവയായ ഈശോയുടെ തിരുഹൃദയമേ
ഞങ്ങളുടെ ജീവനും ഉയിര്‍പ്പുമായ ഈശോയുടെ തിരുഹൃദയമേ
ഞങ്ങളുടെ സമാധാനവും യോജിപ്പുമായ ഈശോയുടെ തിരുഹൃദയമേ
ഞങ്ങളുടെ പാപങ്ങള്‍ക്കു പരിഹാരബലിയായ ഈശോയുടെ തിരുഹൃദയമേ
അങ്ങില്‍ ആശ്രയിക്കുന്നവരുടെ രക്ഷയായ ഈശോയുടെ തിരുഹൃദയമേ
അങ്ങില്‍ മരിക്കുന്നവരുടെ ശരണമായ ഈശോയുടെ തിരുഹൃദയമേ (ഞങ്ങളെ അനുഗ്രഹിക്കണമേ)
സകല പുണ്യവാന്മാരുടെയും ആനന്ദമായ ഈശോയുടെ തിരുഹൃദയമേ 

ലോകത്തിന്റെ പാപങ്ങള്‍ നീക്കുന്ന ദിവ്യകുഞ്ഞാടെ
കര്‍ത്താവേ ഞങ്ങളുടെ പാപങ്ങള്‍ പൊറുക്കണമേ
ലോകത്തിന്റെ പാപങ്ങള്‍ നീക്കുന്ന ദിവ്യ കുഞ്ഞാടെ
കര്‍ത്താവേ ഞങ്ങളുടെ പ്രാര്‍ത്ഥന നീ കേള്‍ക്കണമേ
ലോകത്തിന്റെ പാപങ്ങള്‍ നീക്കുന്ന ദിവ്യ കുഞ്ഞാടെ
കര്‍ത്താവേ ഞങ്ങളെ അനുഗ്രഹിക്കണമേ

ഉ. ഹൃദയശാന്തതയും എളിമയുമുള്ള ഈശോയേ

സ. ഞങ്ങളുടെ ഹൃദയം അങ്ങേ തിരുഹൃദയത്തിന് തുല്യമാക്കി അരുളണമേ

പ്രാര്‍ത്ഥിക്ക,

സര്‍വ്വശക്തനും നിത്യനുമായ സര്‍വ്വേശ്വരാ,അങ്ങേ പ്രിയപുത്രന്റെ തിരുഹൃദയത്തോടും പാപികള്‍ക്കായി താന്‍ അങ്ങേയ്ക്ക് കാഴ്ചവെച്ച സ്തുതികളോടും പാപപരിഹാരങ്ങളെയും തൃക്കണ്‍ പാര്‍ത്ത് താഴ്മയോട് അങ്ങേ കൃപയെ യാചിക്കുന്ന ഞങ്ങള്‍ക്കു ദയാപരനായി മാപ്പു തന്ന് അരുളണമേ.ഈ
അപേക്ഷകളൊക്കെയും അങ്ങയോടും പരിശുദ്ധാല്‍മാവിനോടും കൂടെ എന്നെന്നും ദൈവമായി ജീവിച്ചു വാഴുന്ന
അങ്ങേ തിരുകുമാരന്‍ ഈശോമിശിഹായുടെ നാമത്തില്‍ ഞങ്ങള്‍ക്കു തന്ന് അരുളണമേ.

 

ആമ്മേന്‍

Our Lady Of Assumption Church

Vlathankara,Vlathankara P.O.

Thiruvananthapuram

Kerala, India Pin : 695134

  • Facebook Social Icon

©2019 BY SWARGAROPITHA MATHA CHURCH