സാത്താനെയും ദുഷ്ടാരൂപികളെയും ബഹിഷ്ക്കരിക്കുവാനുളള പ്രാർത്ഥന

(പൈശാചിക ശക്തിയെ ചോർത്തിക്കളഞ്ഞ് മനുഷ്യന് ഉപദ്രവം ചെയ്യുന്നതിൽ നിന്നും അവനെ തടയുന്ന ഒരു ബഹിഷ്ക്കരണ പ്രാർത്ഥനയാണ് ഇത്. ഭാഗ്യസ്മ‌രണാർഹനായ ലെയോ XIII പാപ്പ, ഈ പ്രാർത്ഥന പതിവായി ഉപയോഗിക്കുവാൻ വിശ്വാസികളോട്, പ്രത്യേകിച്ച് വൈദികരോട് ആവശ്യപ്പെട്ടിരുന്നു. പൈശാചിക പ്രവർത്തനം സംശയിക്കത്തക്ക സാഹചര്യങ്ങളിൽ കീഴടക്കാൻ അസാദ്ധ്യമെന് തോന്നുന്ന പ്രലോഭനങ്ങൾ, വിട്ടുമാറാത്ത ദുശ്ശീലങ്ങൾ, നിയന്ത്രണാതീതമായി അനുഭവപ്പെടുന്ന വൈകാരിക ക്ഷോഭങ്ങൾ, മാറാത്ത കലഹങ്ങൾ, മരുന്നുകൾ ഒന്നും ഫലിക്കാതെ തുടരുന്ന ചില രോഗങ്ങൾ, ക്ഷുദ്ര പ്രയോഗങ്ങൾ - etc- ഈ  പ്രാർത്ഥന വിശ്വാസപൂർവ്വം ഉപയോഗിക്കുന്നവർക്ക് ആശ്വാ സവും ശക്തിയും ലഭിക്കും. ഉപവസിച്ച് പ്രാർത്ഥിക്കുന്നത് ഏറ്റവും നല്ലത് (മാർക്കോ. 9 :29). പശ്ചാത്തപിക്കുവാൻ തയ്യാ റാകാതെ ബോധപൂർവ്വം പാപാവസ്ഥയിൽ കഴിയുന്നവർ ഈ പ്രാർത്ഥന ഉപയോഗിക്കുന്നത് അപകടകരമാണ്.)

വി. കുരിശിൻ്റെ അടയാളത്താൽ + ഞങ്ങളുടെ ശത്രുക്കളിൽ നിന്നും  ഞങ്ങളെരക്ഷിച്ചുകൊള്ളണമേ, ഞങ്ങളുടെ തമ്പുരാനെ + പിതാവിൻ്റെയും പുത്രൻ്റെയും പരിശുദ്ധാത്മാവൻ്റെയും നാമത്തിൽ

ആമ്മേൻ.

A. മുഖ്യ ദൈവദൂതനായ വി. മിഖായേലിനോട് സഹായ അപേക്ഷ.

മുഖ്യദൈവദൂതനായ വി. മിഖായേലേ, സ്വർഗ്ഗീയ സൈന്യങ്ങളുടെ ഏറ്റവും മഹത്വപൂർണ്ണനായ സൈന്യാധിപനേ, പ്രഭുത്വങ്ങൾക്കും ആധിപത്യങ്ങൾക്കും ഈ അന്ധകാര ലോകത്തിൻ്റെ അധിപന്മാർക്കും സ്വർഗ്ഗീയ ഇടങ്ങളിൽ വർത്തിക്കുന്ന തിന്മയുടെ ദുരാത്മാക്കൾക്കുമെതിരായുളള (എഫേ. 6:12) ഞങ്ങളുടെ പോരാട്ടത്തിൽ ഞങ്ങൾക്കു തുണയായിരിക്കണമേ. ദൈവം തൻ്റെ സാദൃശ്യത്തിൽ സൃഷ്‌ടിച്ച്, വലിയ വിലകൊടുത്ത് പിശാചിൻ്റെ ആധിപത്യത്തിൽ നിന്നും മോചിപ്പിച്ച മനുഷ്യവർഗ്ഗത്തിൻ്റെ സഹായത്തിന് എത്തണമേ. തിരുസഭ അങ്ങയെ അവളുടെ സംരക്ഷകനായി വണങ്ങുന്നു. രക്ഷിക്കപ്പെട്ട ആത്മാക്കളെ സ്വർഗ്ഗത്തിലേക്ക് ആനയിക്കുവാനുളള ഉത്തരവാദിത്വം നമ്മുടെ കർത്താവ് അങ്ങയെ ആണല്ലോ ഭരമേൽപ്പിച്ചിരിക്കുന്നത്. അതിനാൽ വി. മിഖായേലേ, സാത്താൻ ഇനിയൊരിക്കലും മനുഷ്യമക്കളെ ബന്ധനത്തിലാക്കി സഭയെ പീഡിപ്പിക്കുവാൻ ഇടയാകാതിരിക്കുന്നതിന് അവനെ അവിടുത്തെ തൃപ്പാദത്തിൻകീഴിൽ ഞെരുക്കുന്നതിനായി, സമാധാനത്തിന്റെ ദൈവത്തോട് പ്രാർത്ഥിക്കണമെ. ഞങ്ങൾ ജപിക്കുന്ന ഈ പ്രാർത്ഥന അത്യുന്നത ദൈവസന്നിധിയിൽ അങ്ങു തന്നെ സമർപ്പിക്കണമേ. അതുവഴി, ദൈവത്തിൻ്റെ കാരുണ്യം എത്രയും വേഗം ഞങ്ങളുടെമേൽ ചൊരിയുവാൻ ഇടയാകട്ടെ. സാത്താനും പിശാചുമായ ആ പുരാതന സർപ്പത്തെ പിടിച്ചടക്കിബന്ധിച്ച് അവൻ ഇനിയും ജനതകളെ വഞ്ചിക്കാതിരിക്കുവാനായി പാതാളത്തിലേക്ക് എറിയേണമേ. (വെളി. 20:2)

ആമ്മേൻ

 B. ബഹിഷ്‌ക്കരണ പ്രാർത്ഥന

ഞങ്ങളുടെ കർത്താവും ദൈവവുമായ ഈശോമിശിഹായുടെ നാമത്തിൽ, ദൈവമാതാവായ അമലോത്ഭവ കന്യാമറിയത്തിൻ്റെയും, മുഖ്യദൂതനായ വി. മിഖായേലിന്റെയും, ശ്ലീഹന്മാരായ വി. പത്രോസിൻ്റെയും വി. പൗലോസിൻ്റെയും മദ്ധ്യസ്ഥതയിൽ അഭയം ഗമിച്ച് (വൈദികരെങ്കിൽ, എൻ്റെ ശുശ്രൂഷാ പൗരോഹിത്യത്തിൻ്റെ പരിശുദ്ധ ശക്തിയാലും) പിശാചിൻ്റെ ആക്രമണങ്ങളെയും വഞ്ചനകളെയും പരാജയപ്പെടുത്തുവാൻ ഞങ്ങൾ പ്രത്യാശപൂർവ്വം ഒരുമ്പെടുന്നു. 

1. ദൈവം എഴുന്നള്ളുമ്പോൾ അവിടുത്തെ ശത്രുക്കൾ ചിതറിക്കപ്പെടുന്നു. അവിടുത്തെ ദ്വേഷിക്കുന്നവർ പാലായനം ചെയ്യുന്നു.

2. പുക മറഞ്ഞുപോകുന്നതുപോലെ അവർ അപ്രത്യക്ഷരാകുന്നു. തീയിൽ മെഴുക് എന്നതുപോലെ അവിടുത്തെ ശത്രുക്കൾ നശിക്കുന്നു. (സങ്കീ: 67) 

1. കർത്താവിൻ്റെ കുരിശുകാണുമ്പോൾ ശ്രത്രുക്കൾ ഭയപ്പെട്ടോടുന്നു.

2. യൂദാവംശത്തിൻ്റെ സിംഹം, ദാവീദിന്റെ സന്തതി ; അവിടുന്ന് ശത്രുക്കളെയെല്ലാം കീഴടക്കി. (വെളി 5:5)


1. കർത്താവേ, അങ്ങയുടെ കാരുണ്യം ഞങ്ങളുടെ മേൽ വർഷിക്കണമേ.

2. ഞങ്ങൾക്ക് അങ്ങയിലുള്ള വലുതായ പ്രത്യാശപോലെ. 

(തുടർന്നുവരുന്ന പ്രാർത്ഥനയിലെ 33 കുരിശടയാളങ്ങളിൽ സ്വയം കുരിശുവരയ്ക്കുക. വൈദികരെങ്കിൽ ആശിർവാദം നൽകുക.)

അശുദ്ധാത്മാക്കളേ + പൈശാചിക ശക്തികളേ + നാരകീയ ശത്രുക്കളേ + എല്ലാ വഞ്ചക സമൂഹങ്ങളേ + സാത്താൻ്റെ സംഘങ്ങളേ + ഗണങ്ങളേ + നിങ്ങൾ ആരായിരുന്നാലും ഞങ്ങളുടെ കർത്താവീശോമിശിഹായുടെ നാമത്തിലും അവിടുത്തെ അധികാരത്തിലും ഞങ്ങൾ നിങ്ങളെ ബന്ധിച്ച് + ശാസിച്ച് + ബഹിഷ്ക്കരിക്കുന്നു + ദൈവത്തിന്റെ തിരുസഭയിൽ നിന്നും ദൈവസാദൃശ്യത്തിലും ഛായയിലും സൃഷ്ടിക്കപ്പെട്ടതും ദിവ്യചെമ്മരിയാടിന്റെ അമൂല്യ രക്തത്താൽ പരിത്രാണം ചെയ്യപ്പെട്ടതുമായ മനുഷ്യാത്മാക്കളിൽ നിന്നും ബഹിഷ്കൃതനായി നീ പലായനം ചെയ്യുക + ഏറ്റവും സൂത്രശാലിയായ നാരകീയ സർപ്പമേ, ഇനിയൊരിക്കലും മാനവകുലത്തെ വഞ്ചിക്കുവാനും, സഭയെ പീഡിപ്പിക്കുവാനും, ദൈവത്തിൻ്റെ തിരഞ്ഞെടുക്കപ്പെട്ടവരെ മർദ്ദിക്കുവാനും, അവരെ ഗോതമ്പു പോലെ കൊഴിക്കുവാനും നീ വ്യാമോഹിക്കേണ്ട. + നിൻ്റെ അതിരറ്റ അഹന്തയിൽ ആരോടു തുല്യനാണന്നു നീ അവകാശപ്പെടുന്നുവോ ആ അത്യുന്നത ദൈവം നിന്നോടു കല്പിക്കുന്നു + ആ ദൈവം എല്ലാ മനുഷ്യരും രക്ഷ പ്രാപിക്കണമെന്നും സത്യം ഗ്രഹിക്കണമെന്നുമാഗ്രഹിക്കുന്നു (1 തി 2 : 4). പിതാവായ ദൈവം നിന്നോടു കൽപിക്കുന്നു + പുത്രനായ ദൈവം നിന്നോടു കല്പിക്കുന്നു + പരിശുദ്ധാത്മാവായ ദൈവം നിന്നോടു കൽപിക്കുന്നു + നിൻ്റെ അസൂയ നിമിത്തം നീ മനുഷ്യ വംശത്തിന് ചെയ്‌ത നാശത്തെ അതിലംഘിക്കുവാൻ ദൈവവചനമായ ക്രിസ്‌തു മനുഷ്യനായി അവതരിച്ച് മരണംവരെ അനുസരണമുളളവനായി ഞങ്ങളുടെ വംശത്തെ രക്ഷിച്ചു. (ഫിലി 2:8) തൻ്റെ സഭയെ ഉറപ്പുളള പാറമേൽ സ്ഥാപിക്കുകയും ലോകാവസാനം വരെ എല്ലാ നാളുകളിലും അവളോടുകൂടെ വസിക്കുന്നതിനാൽ (മത്താ 28:20) നരക വാതിലുകൾ അവൾക്കെതിരായി പ്രബലപ്പെടുകയില്ലന്ന് പ്രഖ്യാപിക്കുകയും ചെയ്‌ത മിശിഹാ നിന്നോട് കല്പിക്കുന്നു + പരിശുദ്ധ കുരിശിൻ്റെ അടയാളം നിന്നോട് കല്‌പിക്കുന്നു + അപ്രകാരം തന്നെ, ക്രിസ്തീയ വിശ്വാസ സത്യങ്ങളുടെ ശക്തിയും നിന്നോട് കല്പിക്കുന്നു + മഹത്വപൂർണ്ണയും ദൈവമാതാവും തൻ്റെ എളിമയിൽ ഉത്ഭവത്തിൻ്റെ പ്രഥമക്ഷണത്തിൽത്തന്നെ അമലോത്ഭവയും നിൻ്റെ ഗർവ്വിഷ്‌ഠമായ തലയെ തകർത്ത സ്വർഗ്ഗരാജ്ഞിയുമായ പ. കന്യാമറിയം, നിന്നോട് കല്പിക്കുന്നു. + വി. പത്രോസ്, പൗലോസ് ശ്ലീഹന്മാരുടേയും മറ്റ് അപ്പസ്തോലന്മാരുടേയും വിശ്വാസം നിന്നോട് കല്‌പിക്കുന്നു + വേദസാക്ഷികളുടേയും എല്ലാ വിശുദ്ധരുടേയും പ്രത്യേകിച്ച് ......ടെയും) ഭക്തിപൂർവ്വമായ മദ്ധ്യസ്ഥതയും നിന്നോട് കല്പിക്കുന്നു. + 

ഇപ്രകാരം ശപിക്കപ്പെട്ട ഭീകര സർപ്പമേ + പൈശാചിക സമൂഹങ്ങളേ + സജീവദൈവനാമത്തിൽ + സത്യ ദൈവനാമത്തിൽ + പരിശുദ്ധമായ ദൈവനാമത്തിൽ + തൻ്റെ ഏക പുത്രനിൽ വിശ്വസിക്കുന്ന ഒരുവനും നശിച്ചു പോകാതെ അവന് നിത്യജീവൻ ഉണ്ടാകേണ്ടതിന് അവിടുത്തെ ഏകജാതനെ നൽകുവാൻ തക്കവണ്ണം ലോകത്തെ അത്രമാത്രം സ്നേഹിച്ച ദൈവനാമത്തിൽ (യോഹ 3 :16) ഞങ്ങൾ നിങ്ങളെ ശപിക്കുന്നു + മനുഷ്യരെ വഞ്ചിക്കുകയും, അവരിൽ നിത്യ നാശത്തിൻ്റെ വിഷം വർഷിക്കുകയും, സഭയെ ഉപദ്രവിക്കുകയും, അവളുടെ സ്വാതന്ത്ര്യത്തെ നിഹനിക്കുകയും ചെയ്യുന്നത് അവസാനിപ്പിക്കുവാൻ നിങ്ങളോട് ഞങ്ങൾ കല്പ്‌പിക്കുന്നു + സകല വഞ്ചനയുടെയും ഉപജ്ഞാതാവും ഉടമയും മനുഷ്യരക്ഷയുടെ ശത്രുവുമായ സാത്താനേ നീ പോവുക + നിൻ്റെ പ്രവർത്തനങ്ങൾ യാതൊന്നും മിശിഹായിൽ ഇല്ല. അവിടുത്തേക്ക് നീ ആധിപത്യം നൽകുക + അവിടുത്തെ തിരുരക്തത്തിൻ്റെ വിലയാൽ വീണ്ടെടുത്ത ഏകവും, പരിശുദ്ധവും, കാത്തോലികവും അപ്പസ്തോലികവുമായ തിരുസഭയുടെ മുമ്പാകെ നീ മാറിക്കൊടുക്കുക + ദൈവത്തിൻ്റെ സർവ്വശക്തമായ കരങ്ങളിൽ നീ അമരുക + ഞങ്ങൾ ഈശോമിശിഹായുടെ പരിപാവനവും ഭയജനകവുമായ തിരുനാമം വിളിച്ചപേക്ഷിക്കുന്നതുകേട്ട് ഭയന്ന് വിറച്ച് നീ പലായനം ചെയ്യുക. + സ്വർഗ്ഗദൂതഗണങ്ങളായ ബലവത്തുക്കളും, നാഥകൃത്യന്മാരും, ഭദ്രാസനന്മാരും സവിനയം ഈ തിരുനാമത്തോട് വിധേയത്വമുള്ളവരാണ്. ക്രോവേന്മാരും സ്രാപ്പേന്മാരും നിരന്തരം ഈ തിരുനാമത്തെ പരിശുദ്ധൻ, പരിശുദ്ധൻ, സൈന്യങ്ങളുടെ ദൈവമായ കർത്താവ് പരിശുദ്ധൻ എന്നു പാടിസ്‌തുതിക്കുന്നു.

1. കർത്താവേ, എൻ്റെ പ്രാർത്ഥന കേൾക്കണമേ.

2. എൻ്റെ നിലവിളി അങ്ങേ പക്കലെത്തട്ടെ. 

1. കർത്താവ് നിങ്ങളോട് കൂടെ ഉണ്ടായിരിക്കട്ടെ. 

2. അങ്ങയുടെ (നിങ്ങളുടെ) ആത്മാവോടും കൂടെയുണ്ടായിരിക്കട്ടെ.

നമുക്ക് പ്രാർത്ഥിക്കാം

സ്വർഗ്ഗസ്ഥനായ ദൈവമേ, ഭൂമിയെ പരിപാലിക്കുന്ന കർത്താവേ, മാലാഖമാരുടേയും മുഖ്യദൂതന്മാരുടേയും പൂർവ്വപിതാക്കന്മാരുടേയും, പ്രവാചകന്മാരുടേയും, അപ്പസ്തോലന്മാരുടേയും, വേദസാക്ഷികളുടെയും ദൈവമേ, മരണാനന്തര ജീവനും ജോലിക്കുശേഷം വിശ്രമവും നൽകുവാൻ ശക്തനുമായ ദൈവമേ, അങ്ങല്ലാതെ വേറെ ദൈവമില്ല, ഉണ്ടാകുവാനും സാദ്ധ്യമല്ല. എന്തെന്നാൽ അങ്ങ് ദൃശ്യവും അദ്യശ്യവുമായ സകലത്തിൻ്റേയും സൃഷ്‌ടാവാണ്. അങ്ങയുടെ ഭരണത്തിന് അവസാനമില്ല. ഞങ്ങൾ അങ്ങയുടെ മഹത്വപൂർണ്ണമായ തിരുസന്നിധിയിൽ വിനയപൂർവ്വം സാഷ്‌ടാംഗപ്രണാമം ചെയ്യുന്നു. അങ്ങയുടെ ശക്തിയാൽ നാരകീയ അരൂപികളുടെ ആധിപത്യത്തിൽ നിന്നും തന്ത്രങ്ങളിലും, വ്യാജങ്ങളിലും, ക്രൂരമായ വഞ്ചനകളിൽ നിന്നും ഞങ്ങളെ രക്ഷിക്കണമേ.

ആമ്മേൻ.

1. കർത്താവേ, പിശാചിൻ്റെ തന്ത്രങ്ങളിൽ നിന്ന് ഞങ്ങളെ രക്ഷിക്കേണമേ. അങ്ങയുടെ സമാധാനത്തിലും സ്വാതന്ത്യത്തിലും അങ്ങേക്കു സേവനം അനുഷ്ഠിക്കുവാൻ തിരുസഭയെ അനുഗ്രഹിക്കണമെന്ന് ഞങ്ങൾ പ്രാർത്ഥിക്കുന്നു. 

2. അങ്ങയുടെ സഭയുടെ എല്ലാ ശത്രുക്കളെയും തകർക്കണമെന്ന് അങ്ങയോടു ഞങ്ങൾ പ്രാർത്ഥിക്കുന്നു.

ആമ്മേൻ 

(വെഞ്ചരിച്ച പനിനീർ തളിക്കുന്നു.)


C. മാതാവിനോടുള്ള പ്രാർത്ഥന

മഹത്വപൂർണ്ണയായ സ്വർഗ്ഗരാജ്ഞീ, മാലാഖമാരുടെ നാഥേ, പിശാചിൻ്റെ തല തകർക്കുവാനുള്ള ശക്തി അങ്ങേക്കുണ്ട്. ദൈവത്തിൽ നിന്ന് അതിനുള്ള കല്‌പനയും അങ്ങേക്കുണ്ടല്ലോ. ആകയാൽ അങ്ങയുടെ സ്വർഗ്ഗീയ ദൂതഗണങ്ങളെ ഞങ്ങളുടെ സഹായത്തിന് അയയ്ക്കണമേയെന്ന് ഞങ്ങൾ വിനയപൂർവ്വം അപേക്ഷിക്കുന്നു. അവർ അങ്ങയുടെ കല്പ‌നയനുസരിച്ചും അങ്ങയുടെ ശക്തിയാലും നാരകീയ ശക്തികളെ പിന്തുടർന്ന് തോല്‌പിച്ച് നരകാഗ്നിയിൽ തളളട്ടെ. ദൈവത്തെപ്പോലെ ആരുണ്ട് ? മാലാഖമാരേ, മുഖ്യ ദൂതന്മാരേ ഞങ്ങളെ കാത്തു രക്ഷിക്കണമേ. കരുണയുളള നല്ല അമ്മേ, അങ്ങാണ് ഞങ്ങളുടെ പ്രത്യാശ. ദൈവമാതാവേ, അങ്ങയുടെ മാലാഖമാരെ അയച്ച് ഞങ്ങളെ ദുഷ്ടാരൂപികളിൽനിന്നും കാത്തുകൊള്ളേണമേ.

ആമ്മേൻ.